Hörmətli şeyx buyurdu: Fikri və mənəvi çağırışlar qarşısında səflərimizi birləşdirməliyik.

Ayətullah əl Üzma Şeyx Bəşir Hüseyn Nəcəfinin (kölgəsi davamlı olsun) təmsilçisi və Nəcəf-Əşrəfdəki mərkəzi ofisinin müdiri hörmətli Şeyx Əli Nəcəfi Bəsrə şəhərinin bir qrup alimindən, Əzhəruş-şərif universitetinin professorlarından və xristian dini şəxsiyyətlərindən ibarət bir heyəti qəbul edib.

Görüş zamanı, İslam ümmətinin hazırkı mərhələdə qarşılaşdığı əsas çağırışlar və dinə, onun dəyərlərinə qarşı yönəlmiş sui-planlar müzakirə edilib. Bu planlar gənc nəsillər arasında şübhələr yaratmaq və dinin simasını təhrif etməklə mənəvi və fikri qarışıqlıq törətməyi, nəticədə isə dindar cəmiyyətlərin birliyini zəiflətməyi hədəfləyir.

Hörmətli Şeyx Əli Nəcəfi qeyd edib ki, bu cür hərəkətlər təsadüfi deyil, əksinə, müəyyən siyasi və iqtisadi məqsədlərə xidmət edən planların tərkib hissəsidir. Bu planlar müəyyən xarici qüvvələrin maraqlarına uyğun formalaşdırılmış ideoloji və sosial mühitlər qurmaqla cəmiyyətlərin mənəvi sistemini sarsıtmağa yönəlib.

O, həmçinin vurğulayıb ki, bu layihələrin arxasında duran qüvvələr dinin və dini kimliyin ötən onilliklər ərzində onların planlarını uğursuz etmiş ən böyük sədd olduğunu anlayıblar. Buna görə də, bu gün dini və mənəvi dəyərləri birbaşa hədəfə alırlar.

Şeyx Əli Nəcəfi bütün möminləri ayıqlığa, dini prinsiplərə sadiq qalmağa, həmrəyliyə və birliyə çağıraraq, gənc nəsilləri və cəmiyyəti bu təhlükələrdən qorumağın vacibliyini vurğulayıb.