Ayətullah əl Üzma Şeyx Bəşir Hüseyn Nəcəfinin (kölgəsi davamlı olsun) Bəsrə şəhərinin Deyrə bölgəsindəki nümayəndəsi xalq təşəbbüsü ilə təşkil olunan qanvermə kampaniyasında iştirak edib. Aksiyanın məqsədi talassemiya xəstələrinə dəstək göstərmək olub.

Şeyx Müsənna Rubeyi bu təşəbbüsün əhəmiyyətini vurğulayaraq onu “həyatların xilasına töhfə verən, fədakarlıq və ictimai məsuliyyət ruhunu əks etdirən zəruri addım” kimi qiymətləndirib.

O bildirib ki, bu humanitar təşəbbüs cəmiyyət daxilində həmrəylik və yardımlaşma mədəniyyətini möhkəmləndirir, vətəndaşlar arasında sevgi, mehribanlıq və birliyə dair müsbət bir təsəvvür yaradır. Şeyx Rubeyi əlavə edib ki, bu kampaniya, qan köçürülməsinə mütəmadi ehtiyac duyan xəstələrə dəstək məqsədilə gələcəkdə daha çox humanitar təşəbbüslərin başlanğıc nöqtəsi olacaq.

Şeyx Rubeyi həmçinin qeyd edib ki, kampaniya geniş iştirak və yüksək fəallıqla müşahidə olunub. Qan verənlərin sayı 103 nəfəri keçib və onlar bu xeyirxah əmələ dərin inam və könüllü bir ruhla qoşularaq, insan həyatını xilas etməyin və xəstələrin əzabını yüngülləşdirməyin əhəmiyyətini əməli şəkildə nümayiş etdiriblər.