مرجع مسلمين و جہان تشيع حضرت آيت الله العظمیٰ الحاج حافظ بشیر حسین نجفی دام ظلہ الوارف   ‏نے مرکزی دفتر  نجف اشرف میں لکھنؤ ہندوستان سے انجمن غلامان سیدہ زینب علیھا السلام کے وفد کا حجۃ ‏الإسلام والمسلمین علامہ سید شمیم الحسن دام عزہ   کی سربراہی  میں خیر مقدم فرمایا ،‎ ‎وفد میں انجمن کے ‏ممبران ، حضرات علماء کرام اور شعراء کے علاوہ شہر بنارس سے تعلق رکھنے والے ‌‎ ‎جناب ارشاد علی ‏صاحب نے اپنے ہاتھوں سے آب زمزم اور خاک شفا سے تحریر کردہ قران مجید کے تیسویں پارے کو پیش ‏کیا جس پر مرجع عالی قدر دام ظلہ الوارف  نے ان کی یہ کاوش بارگاہ ایزدی  میں مقبول ہو اور  ان کی مزید ‏توفیقات کے لئے دعا کی۔

مرجع عالی قدر دام ظلہ الوارف  نے حضرات علماء کرام سے خطاب کرتے  ہوئے  فرمایا  کہ لکھنؤ کا حوزہ علمیہ  ‏اپنی مثال آپ  تھا میری خواہش  ہے  کہ  میری  زندگی  میں لکھنؤ کے حوزہ علمیہ کی جوانی  پلٹ آئے   اس کے ‏لئے مشترکہ  جد و جہد  کی ضرورت  ہے اور امید  ہے کہ حضرات علماء کرام اپنی بھرپور کوششوں سے لکھنؤ کے ‏حوزے  کی جوانی  پلٹائیں گے  ۔

واضح رہے  کہ انجمن غلامان سیدہ زینب  گذشتہ  گیارہ سالوں  سے  مرکزی دفتر  کی زیر نگرانی اور بمشارکت  حجۃ ‏الاسلام شیخ علی نجفی دام عزہ ( مرجع عالی قدر دام ظلہ الوارف کے فرزند اور مرکزی دفتر  کے مدیر )  بین ‏الحرمین کربلاء مقدسہ  میں ۳ شعبان کو عالمی جشن صبر و وفا کا  اہتمام کرتی  ہے اس سال بھی اس جشن کے ‏لئے انجمن کا وفد تشریف لایا ہے ، وفد نے جشن کی تیاریوں اور جشن کے متعلق تفصیلات مرجع عالی قدر ‏دام ظلہ الوارف  کی خدمت میں پیش کی  جس پر انہوں نے  انجمن  کو مبارکباد دیتے  ہوئے  جشن کی کامیابی ‏کے لئے دعا فرمائی۔ ‏

دوسری  جانب انجمن  نے مرکزی دفتر  کا ان کے تعاون اور سرپرستی  پر  شکریہ  ادا کیا۔ ‏