نجف اشرف: مجلس وحدت المسلمین پاکستان کے سیکرٹری جنرل اور سینیٹر علامہ ناصر عباس جعفری حفظہ اللہ نے آج اپنے وفد کے ہمراہ آیت اللہ العظمیٰ الحاج حافظ بشیر حسین نجفی دام ظلہ الوارف کے مرکزی دفتر نجف اشرف میں ان سے ملاقات کی۔

اس موقع پر مرجع عالی قدر دام ظلہ الوارف نے حوزہ علمیہ نجف اشرف کی عظمت، اس کے علمی کردار اور تاریخ میں اس کے ذریعے پروان چڑھنے والے جلیل القدر علماء کی خدمات پر روشنی ڈالی۔ انہوں نے موجودہ دور میں علماء کرام کی ذمہ داریوں پر بھی مفصل گفتگو فرمائی۔

معزز مہمان علامہ ناصر عباس جعفری حفظہ اللہ نے گفتگو کے دوران کہا کہ آیت اللہ العظمیٰ حافظ بشیر حسین نجفی دام ظلہ الوارف  امت مسلمہ کے لیے بالعموم اور برصغیر پاک و ہند کے لیے بالخصوص اللہ کے نعمتوں میں سے ایک عظیم نعمت ہیں۔ انہوں نے کہا کہ مرجع عالی قدر کا وجود ہمارے لیے امید  ہے اور آپ کا دفتر پوری امت مسلمہ اور برصغیر کے لیے سائبان کی حیثیت رکھتا ہے۔ انہوں نے مزید کہا: “ہماری عزت آپ سے وابستہ ہے۔”

آخر میں علامہ ناصر عباس جعفری نے مرجع عالی قدر دام ظلہ الوارف سے ملاقات کے لیے قیمتی وقت فراہم کرنے پر تہہ دل سے شکریہ ادا کیا۔