Nəcəfi-Əşrəfdəki mərkəzi ofisin rəhbəri və Ayətullah əl Üzma Şeyx Bəşir Hüseyn Nəcəfinin (kölgəsi davamlı olsun) təmsilçisi Şeyx Əli Nəcəfi Ziqar və Babil şəhərlərindən olan bir qrup tələbə heyətini qəbul edib. O, öz dəyərli çıxışında namazın, valideynlərə hörmətin və milli kimliyə sadiqliyin vacibliyini vurğulayaraq, İslam tarixindən nümunələr gətirib və gənclər üçün praktik tövsiyələr verib.

Namaz - dinin sütunu

Şeyx Əli Nəcəfi çıxışına namazın əhəmiyyətini vurğulamaqla başlayıb. O, imam Əli (ə.s), imam Hüseyn (ə.s) və Müslim ibn Əqilin (ə.s) həyatından misallar çəkib. Müslim ibn Əqilin (ə.s) edamından əvvəl iki rükət namaz qılmaq üçün icazə istəməsi, imam Hüseynin (ə.s) Kərbəlada düşmən hücumuna baxmayaraq namaz qılması, imam Əlinin (ə.s) şəhadət anlarında oğlu imam Həsəndən (ə.s) camaat namazını qıldırmasını istəməsi namazın heç bir şəraitdə tərk edilməməsinin vacibliyini göstərir. Həmçinin, imam Sadiqin (ə.s) namaza yüngül yanaşmaq barədə xəbərdarlığına da diqqət çəkib.

Cənnətə aparan yol

Şeyx Əli Nəcəfi valideynlərə hörmətin cənnətə aparan yol olduğunu bildirib. O, Kərbəlada döyüşə girməzdən əvvəl anasından dua istəyən Əli Əkbərin (ə.s) nümunəsini çəkərək, valideyn duasının önəmini vurğulayıb. Tələbələrə valideynlərinə hörmət etməyi, onların əl və ayaqlarını öpməyi, vəfat ediblərsə, qəbrlərini ziyarət etməyi tövsiyə edib. O, həmçinin, valideynlərə qarşı itaətsizliyin ağır nəticələrindən bəhs edərək, belə insanların cənnətin qoxusunu belə hiss etməyəcəklərini bildirib.

Vaxtın idarə olunması və dost seçimi

Şeyx Əli Nəcəfi gənclərə vaxtlarını düzgün bölmələrini tövsiyə edib: bir hissəsini axirət üçün, bir hissəsini dünya işləri üçün, bir hissəsini isə ailələri üçün ayırmağı məsləhət görüb. O, "dünya üçün elə çalış ki, sanki əbədi yaşayacaqsan, axirət üçün isə elə hazırlaş ki, sanki sabah öləcəksən" prinsipinə riayət etməyi tövsiyə edib.

Dost seçiminin əhəmiyyətini vurğulayan Şeyx Əli Nəcəfi yaxşı dostun insanı cənnətə, pis dostun isə cəhənnəmə aparacağını bildirib. O, gəncləri nəfs üzərində nəzarəti itirməməyə, şəhvət və qəzəbə qapılmamağa çağırıb, çünki özünü idarə edə bilməyən insan həyatında heç nəyi idarə edə bilməz.

Elm və çalışqanlığın əhəmiyyəti

Şeyx Əli Nəcəfi gəncləri elmə və təhsilə ciddi yanaşmağa çağırıb. O, gənclik dövrünün həssas bir mərhələ olduğunu, dini və şəri məsələlərə dair biliklərin artırılmasının, fizioloji dəyişikliklərə uyğun davranış formalarının öyrənilməsinin vacibliyini qeyd edib. O, həmçinin, gənclərin yetkin şəxsiyyət formalaşdırma çətinlikləri və təcrübə azlığının bəzi hallarda onları asanlıqla yanlış yollara çəkə biləcəyini bildirib. Buna görə də, onları düzgün dost və yol yoldaşları seçməyə, haqq və batili ayırmağı öyrənməyə təşviq edib.