Ayətullah əl Üzma Şeyx Bəşir Hüseyn Nəcəfi (kölgəsi davamlı olsun), ABŞ-dan gələn və Seyid Həsən Mürtəza Qəzvininin başçılıq etdiyi Əhli-beyt (ə.s) tərəfdarlarından ibarət nümayəndə heyətinə bir sıra dini göstəriş və tövsiyələr verdi.

Ayətullah əl Üzma Şeyx Bəşir Hüseyn Nəcəfi (kölgəsi davamlı olsun) buyurdu ki, Əhli-beyt (ə.s) məktəbinin ardıcılları olaraq mömin icmanın üzərinə böyük məsuliyyət düşür. Onlar imamların (ə.s) elmini, İslamın əsas prinsiplərini və bu ilahi dinin düzgün təlimlərini yaymaq, həmçinin sevgi, dözümlülük, ülfət, yalnız Allaha ibadət, ədalət və haqqın bərqərar olması kimi dəyərləri insanlara çatdırmaq vəzifəsini daşıyırlar. O, vurğuladı ki, Peyğəmbər (s) insanlara hidayət yolunu göstərənlərin yüksək məqam sahibi olduqlarını xüsusi olaraq qeyd etmişdir.

Öz növbəsində, nümayəndə heyəti ABŞ-da yaşayan möminlərin vəziyyəti və Əhli-beyt (ə.s) xatirəsinə keçirilən mərasimlər, dini məclislər və İslam prinsiplərinin təbliği ilə bağlı gördükləri işlər haqqında məlumat verdi.

Hörmətli mərcəi-təqlid (kölgəsi davamlı olsun) sonda nümayəndə heyətinə uğurlar və Allahın razılığını qazandıran əməllərinin qəbul olunmasını arzuladı. Nümayəndə heyəti də hörmətli mərcəi-təqlidin (kölgəsi davamlı olsun) dəyərli tövsiyələrini yüksək qiymətləndirərək, onun sağlamlığı və uzun ömürlü olması üçün dua etdi.