سوال:آغا جی ایک سوال ہے کہ زنجیر زنی کے بعد اگر خون کپڑوں پہ لگ جائے نماز ہو سکتی ہے پورا مسئلہ بتا دیں یہ سبجیکٹ میں لکھا ہوا ہے؟

جواب:بسمہ سبحانہ کسی اور وجہ سے آپ کے جسم سے خون نکلے جو اس کا حکم ہے وہی زنجیر زنی سے نکلنے والے خون کے بعد کا حکم ہے۔ واللہ العالم

سوال:میں ابھی لاہور سے حیدر آباد جا رہا ہوں ٹرین میں ہوں اور نماز کے لئے صحیح جگہ بھی نہیں ہے تو نماز قضاء کر کے پڑھ سکتا ہوں۔

جواب:بسمہ سبحانہ ہاتھ پہ ہاتھ باندھ کر اپنی نماز پڑھیں اور آخری وقت تک انتظار کر کے پڑھیں۔واللہ العالم

سوال:اگر ایک شخص کو آیت الکرسی زبانی یاد نہ ہو تو کیا ایسا شخص نماز وحشت قبر کی پہلی رکعت میں آیت الکرسی کی بجائے کوئی سورت پڑھ سکتا ہے یا نہیں ؟

جواب:بسمہ سبحانہ اس کا فریضہ ہے کہ قرآن کو ہاتھ میں لے کر آیت الکرسی پڑھے۔واللہ العالم

سوال:اگر کوئی شخص غلط فہمی کی بنا پر عِشا کی نماز مغرب کی نماز سے پہلے پڑھ لے اور نماز کے بعد اس امر کی جانب متوجّہ ہو تو کیااس کی نماز صحیح ہے؟

جواب:بسمہ سبحانہ اس کو نماز مغرب کے بعد دوبارہ نماز عشاء پڑھنی ہو گی۔واللہ العالم

سوال:اگر کوئی شخص اپنا لباس دھوئے اور اسے یقین ہو جائے کہ لباس پاک ہو گیا ہے ، اس کے ساتھ نماز پڑھے اور نماز کے بعد اسے پتہ چلے کہ پاک نہیں ہوا تھا توکیا اس کی نماز صحیح ہے؟

جواب:بسمہ سبحانہ نماز صحیح ہے لیکن بہتر ہے کہ نماز کا اعادہ کرے۔واللہ العالم

سوال:اگر اذان اور کلمہ میں علی ولی اللہ پڑھنا فرض ہے تو پھر نماز میں کیوں نہیں پڑھتے؟

جواب:بسمہ سبحانہ علی ولی اللہ نہ اذان میں اور نہ اقامت میں فرض ہے کیونکہ وہ ان دونوں کا جز نہیں ہے البتہ ثواب کے لئے دونوں جگہوں میں پڑھنا جائز ہے۔واللہ العالم

سوال:کیا عشاء کے وتر کو کھڑے ہو کر بجائے دو رکعت بیٹھنے ایک رکعت پڑھ سکتے ہیں؟

جواب:بسمہ سبحانہ پڑھ سکتے ہیں۔واللہ العالم

سوال:نماز کے اختتام پر بغیر کسی حرکت کے تسبیح زہرا سلام اللہ علیہا پڑھنا بہت زیادہ ثواب ہے۔ اگر مصافحہ کیا جائے اور بعد میں تسبیح بعد میں پڑھی جائے تو ثواب کم ہو جاتا ہے ؟

جواب:بسمہ سبحانہ مصافحہ کر سکتے ہیں لیکن بہتر یہ ہے کہ پہلے تسبیح حضرت زہرا علیہا السلام پڑھی جائے۔واللہ العالم

سوال:قبلہ پیش نماز کی تکبیرۃ الاحرام کے بعد کیا یہ ضروری ہے کہ مقتدی یکے بعد دیگرے نماز کی تکبیر کہیں؟

جواب:بسمہ سبحانہ ہر مقتدی جب کہ وہ نماز کے لئے آمادہ ہو فوراً تکبیرۃ الاحرام کہے دیر کے ساتھ کہنے سے نماز جماعت کے ثواب میں کمی ہوتی ہے۔واللہ العالم

سوال:الحمد کی قرأت کے اختتام پرمقتدی زور سے الحمدلله رب العالمین کہتے ہیں اسکا کیا حکم ہے؟

جواب:بسمہ سبحانہ میرے نزدیک اس کا کہنا نماز میں ثابت نہیں ہے۔واللہ العالم